In cesa verso sera
Eco: 'Na man g'à messo l'oio1 drento
e la lanterna taca a dindolar
sora 'na vecia che col cor contento
in zenocion2 s'à messo za a pregar.
Du lavri3 bianchi che se move a stento
de 'na putela i lassa indovinar
'na preghiera che nasse e che no sento,
un'orassion che la me fa pensar.
E sta preghiera no la fa sussuro.
Quasi sconti se vede du tri ciari,
de le ombre che core zo dal muro,
do candele a brusar sora i altari,
soto un cristo cassà in t'un logo scuro,
soto a madone e soto a santi rari.
