A 'na putina
Bela putina, dal bochin de rosa,
co i to cavei incaneladi e biondi,
da i oci neri, così bei rotondi,
che i cose 'l cor par farlo andar in mòsa;
posso saver parchè te te confondi,
se mi te guardo o te voi dir qualcosa?
Vuto farghe anca ti da parmalosa,
che fra do smorfie quel facin te scondi?
Ghetu forsi paura de stracarli
quei ocieti che i brusa come stissi?
O pensito canaia de salvarli,
così rotondi, così neri e bei,
così incassadi ben soto i to rissi,
par far deventar mati sti putei?
