PIEDI DI NINA
Quanto diverso xe sto tempo, Nina,
Da quel che a tì passava in compagnia!
Dal zorno in qua che ti xe andada via
No go più ben nè sera nè matina.
Ste viste, sto zardin e sta colina
No me produse che malinconia!
Qua la Natura tuta inaridía
A gran passi al so fin la se incamina.
Ah dove mai xe adesso quei penini
Che ga tornio quel cocolon d'Amor
S'un modelo che Venere gh'à dà?
Torna torna, mio Ben, in sti zardini,
Che s'unisse a pregarte col mio cuor
I fiori e l'erbe che ti ga tocà.
