Pagina:Poesie veneziane del conte Francesco Cestari.djvu/70

OCCHI DI NINA

IV.

Un dì in t'un pra me vedo a comparir
     Amor pianzendo come un desperà;
     Ma in quel cne ghe domando cossa el ga,
     Me sento da la Fama invece a dir:

„ No 'l xe più in caso i cuori de ferir:
     „ Sto poder, che nissun ga contrastà,
     „ I ochieti de Nineta ga robà
     „ Fandolo da velen cussì morir”.

Tase la Fama, e alora; che portento!
     Portar davanti de Nineta al viso
     Mi m'ò visto volando come el vento.

Ah! che stele quei ochi! In Paradiso
     Me pareva trovarme in quel momento:
     Brusa pur l'arco Amor che xe deciso.