Pagina:Poesie e satire di Pietro Buratti veneziano.pdf/189

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.

E con arte amalgamando
     Le finezze de Parigi
     L'à dà man ai so luigi
     Per comprarse un fià de ton.
Ma quel ton che i bezzi acquista
     No l'è fio de la natura,
     L'è ton spurio, e l'impostura
     Se ghe leze un mio lontan.
Quele spale da bigolo
     Quela mutria, e quel contegno
     Xè in contrasto co l'inzegno,
     L'è un morbin da zarlatan.
Pur dei bezzi la vernise
     Sconde tuto, fin la panza
     E per omo d'importanza
     Passa el conte in società.
Colazion de mezza sfera
     No ghe stuzega el palato,
     Lo vedè sempre in contato
     Co la prima nobiltà.
Al cambiar d'ogni Governo
     Cambia el conte de bandiera.
     Fredo in cuor el ghe fa ciera
     A chi xè sul candelier.
Egualmente morbinoso
     Con Seras ladron perfeto, 5
     O con Goes che al povereto
     Xè del proprio dispensier.
Co sta boria d'aparenza
     Ai Milord lù se taca,
     I Milord el gà la paca
     Mal o ben de scimiotar.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/189&oldid=58607"