A una Letterata
Da qualche zorno fora de Torin
in cerca d'aria bona frescolina,
go ricevudo solo stamatina
el so zentil, cortese biglietin.
E mentre la ringrazio co sestin
del so invido, che aceto, o signorina,
ghe vegnarò molar 'na visitina
par conossarla proprio da vicin.
No so quando, in che zorno, in qual momento
che a la so casa podarò vegnir;
'na roba sola, intanto ghe so dir
e ghe la digo in povartà de rima:
vegnindo, ascoltarò el so avertimento
mandandoghe do righe un zorno prima.
