Cava e meti
Furbo 'l Governo! Dopo tanti lagni
del popolo zuccon par via che 'l sal
el gera tropo caro, e 'ndava mal
i afari e no ghe gera più guadagni,
par farse vèdar giusto e libaral
el ga pensà de far come i grifagni,
overossia, no so se ti me magni,
calar e mantegnir l'entrada egual.
El sal xe caro? ― Ben, lo calaremo,
e in compenso sui zigari e tabaco
i prezzi, za careti, aumentaremo.
Se lagnarà la zente? ― E... semo avezzi;
se gh'è un Governo che no sia macaco,
sempre 'l promete e intanto... el tira bezzi.
