La Manon
Disè quel che volè, ma a parer mio
do note de Manon, sonae pulito,
no ghe stà proprio gnente e gnente indrio
a quanto i megio mestri ormai ga scrito.
Che Arnani, Trovator, Leonora adio,
Otel che apena apena el se tien drito!
Ma che Cavalaria che à za finio
de stomegar el colto e po l'inclìto!
Me l'à dito anca quei de vecia scuola
che la Manon soleva e ve comove
solamente a sentir le prime prove.
Voleu sentir sta arieta del tenor?
Senti: Ma... non, Ma... non ti lascio sola,
ti lascio un figlio ancor, un figlio ancor.
