Quadreto a ogio
Vardè le stravaganze! Ai tempi indrio
quando che su la tela sbrodegava
Tizian o pur Giorgion, e se amirava
el Tintoreto e i Palma, pare e fio,
senza contar quei là che ghe vien drio,
in ogni scarabocio che i miniava,
sempre una bestia lori ghe sgnacava,
e squasi sempre un can, varente Dio!
Al dì de ancuo sior no! Sui quadri nostri
se pol vèdar scolpìa mare natura
e tanti capi bei, come dei mostri,
ma senza el fido can. ― Ogni pitura
ga soltanto un sogeto; a gran rigor
se vede in parte el nome del.... pitor.
