Terra Santa
Che i diga pur, che i diga, quel che i vol
sora de le çità, sui so costumi,
sul clima, su le done, sora el Sol
che tuti ilumina, sora i profumi
che manda 'l pra; ma mi, povaro fiol
de la Laguna, là dove che i lumi
del genio e del saver gnissun no pol,
çerto, negarghe; là dove che i Numi
de le arte bele à scelto el so bel nio,
mi superbo dirò co 'na parola
che de Venezie ghe ne xe una sola.
Mi lasso pur che tuto el ben de Dio
de le çità sorele i me decanta
ma Venezia par mi xe Terra Santa.
