Sta pagina la xe stà trascrita, ma la gà ancora da vegner rileta.
Oh i Dotori!
Corpo de Baco, mi no so capir
cossa che possa aver quela putela;
ela no magna, ela no pol dormir
e da tre zorni no la par più ela.
Mi, za, no posso vèdarla a sofrir
e descolarse come una candela,
vogio che 'l medico me sapia dir
che bruta malatia che la xe quela.
. . . . . . . . . . . . . . . . . . .
Ariva 'l medico, co tuta fiaca,
el varda, el visita, tuti xe atenti,
— Care creature gnente, afar de denti,
ghe pode dar do soldi de triaca.
La serva in pressa la ghe la va a tor
e a la matina..... la putela mor.