Pagina:Levi - Versi in dialetto triestino.djvu/35

Da Wikisource
Sta pagina la xe stà trascrita, ma la gà ancora da vegner rileta.


     Sul stesso leto della morta, intanto
La comare infassava la putela,
Che la gente che sgoba no ga tanto
De sostegnir la spesa
Per comprarse do leti,
E in un de una persona e mesa
I dormi e i xe contenti, povereti.

     Co ga visto el dotor
Che stava andando via,
Quelle done fermade sula porta,
Che fissava con ocio de dolor
Quela povera morta,
El ga dito: da brave, una de cor
Per quela creatura!
Se el papà va al lavor
Che qualchiduna de ela gabi cura.

     La ciogo mi! xe sta una vose sola,
Ma una, la più giovine: — andè là,
Per darghe la fiascheta e te de viola!
Grazie a Dio son mi qua
Per darghe late bon — son forte e stagna
Zinque e uno sie! Sarà una gran cucagna.

     Dir e ciaparse in brazo la putela
Tuto un lampo xe sta. —
A quel azion de amor nobile e bela,
El povero papà
Tuto tremante dala comozion
Le man el ga basà
De quela dona,
Con tanta devozion
Come se fossi stada la Madona

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Levi_-_Versi_in_dialetto_triestino.djvu/35&oldid=69301"