Siora Nani e siora Maria
No xe vero che fioi xe Providenza;
Ghe digo mi, el proverbio xe sbaglià,
Beati quei che in sto mondo xe senza,
Un poco de lavor e un pan i ga.
Mi voria che se perdi la semenza!
Solo miseria e lagrime i ne dà!
Dio me perdoni! I xe la penitenza
Del matrimonio per el gran pecà.
E se xe morto in fasse el suo putel,
Un disgrazià de meno xe a sto mondo,
E un angioleto xe svolado in ciel
I fioi xe un lusso, che li fazzi i siori,
Bestemierò, ma la me credi, in fondo,
Xe de pianzer co i nassi, no co i mori.
