Per un gran sepolcro
Finora nanca un strazo de lumin
Sul gran sepolcro, iera tuto scuro;
Seben che prima e adesso ve assicuro
Fazeva e fa gran ciaro quel divin.
Delito quel de lesa maestà,
Che bisognava presto riparar,
Due sorele latine ga pensà
El sepolcro imortal de iluminar.
Giglio e Alabarda se ga dà parola
A quel nobile impegno de far fronte;
Una lampada artistica e un’ampola
Per versar l'oio xe stà presto pronte.
Dixi el Giglio: quà dormi el creator
De la lingua più bela de la tera.
E l’Alabarda tuta fogo e ardor:
Per difenderla son pronta ala guera
