Una dele tante serve
Mi go una serva tuta scrofolada
Che d’esser credi una gran bela mora,
Co a far spesa la va con la signora
A tuti quanti la ghe dà l’ociada.
Pronte scuse la ga per andar fora,
La sua passion xe remenarse in strada,
A sentirla, ela tuti la inamora,
E chi la guarda peta la ridada.
Per andar a balar, po la xe mata
De Modugno la va spesso a studiar,
E la se magna tuta la mesata.
De far salti la trova sempre el drito,
Se l’orbo vien in corte a strimpelar,
La bala, e che se brusi el rosto o el frito!