XX.
Dime ladro, assassin, mulo, noioso,
Ridicolo, poltron, bestia, somaro;
Dime canagia, tangaro, rabioso,
Piavolo, desparà, mincion, avaro.
Dime sempio, imbeçil, omo da gnente,
Scanzafadìghe, bulo, prepotente.
Dime superbo, dime trufador,
Ma no dirme, Catina, traditor.
XXI.
Te vestirò d'arzento tuta quanta,
De zogie, Cate mia, te vestirò,
E po' davanti a ti come a 'na santa,
In zenocio e a man zonte restarò.
E restarò cussì sera e matina
Fin che me lo dirà la mia Catina.
Fin che me lo dirà el tesoro mio,
Lo adorarò come se adora Dio.
