Pagina:La vera felicità.djvu/15

Da Wikisource
Sta pagina la xe stà trascrita, ma la gà ancora da vegner rileta.

Basta; da là un tocheto fa seren,
     Perchè ’l sior Aquilon se buta in mar.
     El Duca, che de fufa gera pien,
     E che prencipia un poco a respirar,
     A Zefiro ghe dise: Caro ben,
     Conteme un poco su, se se pol dar
     Felicità tra i miseri mortali,
     Che vedo circondai da tanti mali?
Zefiro ghe risponde: La se dà,
     E mi vel posso dir. Saveu perchè?
     Perchè no passa dì, che no sia là;
     Nè contento magior per mi ghe xe.
     È ben vero che assae lontan la stà,
     Tanto lontan, che mai la vederè,
     Co no vegnì con mi, senza tardar,
     La regia, e la regina a contemplar.
Ma come mai voleu che mi la veda?
     Responde el Duca. E l'altro: Pofardia!
     Come l'aquila porta la so preda,
     Su le mie spale mi ve porto via.
     E in t’un menuto, in t’un vedanoveda
     Andemo fin de là dela Turchia;
     E tutti do calemo in quel bel’orto.
     Dove la bela zogia va a diporto.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:La_vera_felicità.djvu/15&oldid=55482"