Pagina:La vera felicità.djvu/13

Da Wikisource
Sta pagina la xe stà trascrita, ma la gà ancora da vegner rileta.

Nè stè a dirme chi se’, ch’el so pur tropo;
     Perchè gnente ghe sconto a chi sta qua.
     So, che ’l vostro cavalo de galopo
     Quasi a piè de sto monte v’ha portà:
     Che senza aver magnà pan, nè frisopo
     Gavè sto monte stesso superà;
     E che, a forza de strussie, e de gran stenti,
     In casa sè vegnù dei sete venti.
In casa dei mi fioli, in casa mia;
     In t’una casa, che no xe per vu.
     Ve lo digo de cuor... Ma si perdía!
     Co i vien, i fa un fracasso che mai più.
     Cenere, bronze, stizi i porta via,
     E tuto quanto va col culo in su;
     E po i fa un fredo tal, che xe un delirio;
     Se vu ve trovè qua, deventè un cirio...
Ma stolta, che mi son!.. Tasè, tasè,
     Chè no me recordava che go un fio
     Diferente dai altri, a segno che
     El xe ’l mio beniamin, l’ idolo mio...
     Zefireto, no so se ’l conossè...
     Oh quelo sì xe un puto pien de brio,
     Pien de graziete, e pien de civiltà...
     Ma me par de sentirlo! ecolo qua.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:La_vera_felicità.djvu/13&oldid=55475"