Pagina:La regata de Venezia (1845).djvu/50

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.



Mal prevede chi prevede
     Che qualcun sia 'l favorìo,
     Che co manco lu lo crede
     52Forse quelo resta indrìo.

La và a forza, la và a tàtica,
     La và a cuor, la và a destrezza;
     E dipende da la pratica
     56De far tuto co sveltezza.

Quei che gà una bona schena,
     Boni brazzi, e bon polmon,
     Nel vogar i gà più lena,
     60E i xe manco in aprension.

Ma se vede anca fra lori
     Che gh'è pur disparità;
     E che resta vincitori
     64Queli più che ghe ne sa.

Quando un Bravo passa l'altro
     Gh'è gran strèpito de eviva;
     Ma se dopo, da più scaltro,
     68Quelo indrìo davanti ariva,

Dai amici e dai parenti
     Xe dà el segno del vantagio;
     E i aplausi in quei momenti
     72Ghe radopia el so coragio.

Su da l'acqua i sginzi salta,
     Che per aria i par brilanti,
     E cascando i se rebalta
     76Su la schena ai Regatanti.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:La_regata_de_Venezia_(1845).djvu/50&oldid=66172"