A sto quarto in mezo stava
Un porcheto piturà,
Che po vivo se donava
80A chi 'l zalo gera dà.
Forse questo se faceva
Per aponto dimostrar
Che chi l'ultimo vinceva
84Più stentava a capitar.
Perchè ìnfati un porco el simbolo
Xè de queli che sta indrìo,
E che ariva per pegrizia,
88Se sol dir, co piase a Dio.
Ma sebèn al quarto premio
Sto segnal ghe fusse messo,
Quel porcheto onor da pàlio
92Calcolà gera l'istesso.
Chè le barche gera varie
A una sfida destinàe,
Quando quatro gera 'l numero,
96E no più de le premiàe.
Ma anca a quei che no arivava
Qualche premio a guadagnar,
Pur aplausi se ghe fava
100Per poderli confortar.
Generoso questo prova
Che xe sempre el Venezian;
Che capace lu se trova
104D'esser giusto, e cortesan.
