Quanti oprime la fede, e l'inocenza,
E dà rechia, e fomento a l'impostura!
E, s'Avarizia, e autorità congiura,
100Forz'è, che la Giustizia habia pazienza.
Quanti, che par la cortesia medema,
E ve fà sù le galte i squaquarini,
Hà de Nibio le man tute rampini,
104E sempre pensa à qualche stratagema?
Mà che sarà, quando sarà prefisso
Ch'habiè a la Tera el vostro corpo reso?
No' portere de l'oro altro, che'l peso,
108Che ve profonderà forsi a l'Abisso.
Forsi a l'Eternità v'avre le porte
L'oro, ch'è vostra Deità terena?
Chè sarà? che sarà? Con borsa piena
112Credeu comprar l'indulto de la Morte?
Savè che semo pelegrini al Mondo,
Che no' n'è nostra Patria, e alfin se lassa
Tuti i possessi; e dal vegiar se passa
116A letargo mortifero, e profondo.
