Quanti Pigmaleoni avidi in pele
Vedemo andar de mansueti Agnei,
Che tiol la vita ai miseri Sichei,
80E tende insidie à le Didon sorele!
Quanti iniqui Simoni el Cielo ofende,
E stuzzega ogni dì l'ira divina!
La de l'oro crudel fame canina
84Tanto hà d'ardir, che'l Sacerdozio vende.
Quanti richi Epuloni empij, inumani
Ride, al languir de i Lazari infelici!
E, in pè de darghe (ò de pietà nemici!)
88Picol socorso, i ghe desliga i Cani!
quanti Scarioti manegoldi
Vende el sangue inocente, e rompe i pati
De l'Amicizia, avaramente trati
92Dal guadagno meschin de trenta soldi!
Quanti Mide, de l'oro sitibondi,
Bramando l'oro in tuto quel, che i toca,
Tra l'oro impoverisce, e infin traboca,
96Con l'oro in man, d'ogni miseria al fondi!
