Soni posso dormir dolci la note,
Lontan da brame sregolade, avare;
E pur m'agrada haver vezilie amare,
40Per andar osservà sù piere cote.
In tugurio habitar posso, ch'è mio,
Picolo sì, ma comodo a bastanza;
E, per vane aparenze, a la sustanza
44Vivo retroso, e al comodo restio.
Gran frenesia, che impresonar se dieba
La volontà! quanto el giudicio è losco!
Mo l'e pur megio esser Osel de Bosco,
48(Co' se suol dir) ch'esser Osel de cheba.
Semo tirai, come se tira el sorze
A stufo de lardelo, o d'onta crosta:
Se andemo a incotegar da nostra posta:
52Se core al trabuchel, ne se ne acorze.
Mo no' se amete certe usanze strambe,
Che n'è de pena, e ne fà sempre guera?
Cossa è le veste strassinae per tera?
56No' xele intrighi, e impazzi de le gambe?
