Mame e papà se unisse a far musina
par «cromparne» 1 qua o là; soto la scala....
soto un fior o ’na pianta... o za in cantina...
o nel fosso... o sui copi... o drettto in stala...
E nei campi o a l’uficio o a l’oficina
suda el pare,... el laara,... e resta a gala
la baràca.... E la mama fa matina
fra pianti e strussie s’el putin se amàla....
I ne 'nsegna i passini; e parolete
pa’, ’l «bombo», el pan, la pàpa, el vestitin:
i ne veste, i ne basa, i ne consola!
...Ma 'l sarvel resta udo! E ci ne mete
con passiensa ’na presa de sal fin
drento la suca l’è ’l Maestro a Scola!.....
Giuseppe Barni
Un todesco el va in t’un'ostarla e el ordina ’na porzion de vedél in umido.
Quando el camarier el ghe la porta, lu ’l ghe domanda:
— Quanto costare?
— Ottanta centesimi.
— E pocio?
— Quello niente, l'è sol el contorno.
El todesco alora, quando el sente che el pocio no ’l costa niente, el ghe dise al camarier:
— Mi non folere carne, e ti mi portare altretanto pocio.
