A dì undexe pur de april, el signor Turco si fexe impiantar le sue bumbarde per me' le mure de tera, ai più deboli luoghi de la tera, per aver piutosto sua intention. Le dite bombarde si fo impiantade in quatro luoghi; prima ne messe tre bombarde per mezzo del palazo del serenissimo imperador, e tre altre bombarde messele per mezo la porta del pigi, e do altre bombarde messele a la porta del Cresu, e altre quatro bombarde messele alla porta de san Romano, dove che sun la più debel porta de tuta la tera. Una de queste quatro bombarde che sun a la porta da San Romano, la piera de la bumbarda se pexa livre mile e duxento a la grossa, volze la piera quarte tredexe, considerate che colpo teribile che la fea dove che la zonzeva1. La segonda bombarda, la piera se pexava livre otozento, volze la piera quarte nove; queste do bombarde son le più grosse che abia questo can Turco, le altre bumbarde si son de più raxon, da livre cinque cento fina da livre duxento, e de minor ancora.
A dì dodexe pur april, a hora de meza terza, azonse l'armada del Turco per mezo el porto de Costantinopoli, intendando questa armada sempre si vignia remizando, e andò da la banda de la Natolia, perchè il paexe si era del Turco, perchè si questa armada fosse vignuda da la banda de Costantinopoli, l'averia abudo impazo assai da l'armada nostra de cristiani. A hore sete de zorno, tuta la dita armada fo compida de sorzer al sorzador2 in uno luogo che se chiama le colone, che son mia do lutan da Costantinopoli da la banda de mar mazor, e sorse in quel luogo come vi ho dito con gran vigoria de cridi, e de sonarj de nachare e de tamburli per muodo che quaxi feva paura a la nostra armada, e a queli de la tera. La dita armada del Turco fo vele cento e quaranta cinque fra galie e fuste e parandarie e bergantini, ma ne iera galie dodexe compìe, fuste grose ne iera da setanta in otanta, parandarie da vinti in vinti cinque, tuto el resto si iera bregantini; etiam in questa armada del turco si ne iera una nave de zerca bote trexento, la qual vene da Sinopoli carga de piere de bombarda e de gradizi, e de legnami, et altre munition per il suo campo, segondo uxanza, come se fa ai campi, le cose nezesarie. Siando sorta tuta questa armada del Turco a le colone, per questo zorno non feze altra movesta, stete ognomo quieti, ma nui cristiani che dubitaemo del nostro nemigo, tuto el zorno e la note, si stevemo in arme, cusì le nave, come le galie, e la cadena ben in ponto,
