andar a torno le mure da la banda da tera, azochè el perfido Turco nemigo nostro, podesse veder queli cussì ben in ordene, e azò a Turchi se desse ad intender che el fosse zente assai in la tera. Come i ave dado una volta atorno le mure de la zitade, pur solamente da la banda da tera dove che iera el campo, che sun mia sie, tuta la zente tornò in galia a dexarmarse, e le galie si tornò al suo sorzador per mè Pera; parse bel conforto questa zente a queli de la zitade, e parse stranio al nemigo.
A dì nuove de questo pur aprile, vedando, che pur del tuto questo perfido Turco voia vegnir cun la sua armada acumpagnada cun el campo da tera, per voler otegnir sua maledeta intention, de voler al tuto tuor la povera zittade de Costantinopoli, e però l'acade a far bona provixion sopra de zò, da la banda del porto, e però metessemo acosto de la cadena, che iera a traverso del porto, nove nave le più grosse che se truova a esser in porto, le qual nave siando per longo dela cadena, si azonzeva da Costantinopoli per in fina in Pera, e tute nove nave si era ben ingaridade1, e benissimo in ordene,
come quele si volesse tuor bataia, e assai mejo una che l'altra; patroni di quele si era i soto scritti:
- ser Zorzi Doria zenovexe, de botte 2500,
- ser Zuan Zustignan zenovexe, de botte 1200,
- una de Anchontani de botte 1000,
- una de l'imperador de Costantinopoli de botte 1000,
- ser Zuan Venier da Candia de botte 800,
- el Filamati de Candia de botte 800,
- el Guro de Candia de botte 700,
- la Gataloxa de Zenova de botte 800,
- una altra da Zenova de botte 600,
- uno Belingier2 da Zenova de botte 700.
In nel porto, dentro da la cadena, ne romaxe nave diexesete chebade3, galie tre da la Tana, galie do sutile da Veniexia, e galie cinque de l'imperador de Costantinopoli, le qual galie cinque si era dexarmade, e ancora ne iera assai navili dexarmadi, e messi a fondi per dubito de fuogo, e de bote de bombarda. Vedando nui aver tanta armada da mar, liberamente se tegnìemo seguri contra quela del perfido Turco, e massima abiando la cadena a traverso del porto, etiam una tore per ladi de la zitade, zoè una da la banda de Costantinopoli, l'altra da la banda de Pera, le qual tore vignia a far defexa assai.
