Questi, (fra i quai ghe so' anca mi), i se ris'cia
A butarve in françese un tresolì,
Ma po' sentindo che el sì vostro el fis'cia
Un poco, e 'l stona col bel nostro si;
O per paura de quel bruto muso
Longo che arente e sempre a drio ve stà,
Savendo che l'afar ghe andaria sbuso,
Pian pian, uno a la volta, i ghe la dà.
Mi resto, infin che da la Tore i Mori
Co i so bravi martei bate le dò,
Per vèdar, come 'na piova de fiori,
Da i Palazzi i colombi svolar zo.
― «Ocio, Signora, che i ghe vien adosso
E i ghe sporca la blusa e 'l capelin...»
(No la me scolta, e col so bel scartosso
La ghe darave anca el so coresin)...
Mi gò osservà che, più ghe piase quei
Dal colo longo; ma no so el perchè...
Diseva un tal: Se i fusse tanti osei
Rostii sul speo, ah! co magnar da re!...
Oh, se anca mi, bogia de un mondo can,
Un colombo podesse deventar...
Per svolarve, o Signore, in-te-le man,
E farme da vualtre cocolar!
Vegnirve sui zenoci e su le spale!
Meter el beco in-te quel bel bochin,
Bever el vostro spuo... e po' verzer le ale,
Svolar, e dirve: «Adieù, Madam Bibin!...»
Pagina:Gerani - Poesie veneziane, Venezia, Ferrari, 1903.pdf/38
Sta pagina la xe stà trascrita, ma la gà ancora da vegner rileta.