VIII.
I COLOMBI DE SA' MARCO
Ala Signorina Maria nob. Turzanka
Quando ve vedo, o forestiere bionde
Co in man la Guida e al fianco el canocial,
Come sirene vegnir su da le onde,
Reçitarve vorave un madrigal.
Se' bele, inzenociae drento le Cese
Davanti a le Madone de Tizian,
E brave a tabeldò a l'Hôtel Ingrese,
E bone ai ponci del Cafè Florian.
Ma, a dir la verità, me piasè megio
Quando ve vedo in Piazza çircondae
De colombi e de... merli; quei, de mègio
Tanto golosi; e sti altri, de sfogiae...
