Pagina:Gerani - Poesie veneziane, Venezia, Ferrari, 1903.pdf/28

Da Wikisource
Sta pagina la xe stà trascrita, ma la gà ancora da vegner rileta.
II.


INVIDO


Andèmo zo: tìrite su i cavei,
     Mètite el sial che andemo a far do passi;
     Ma lassa là le bucole e i to anei
     Che no i ne diga: Varda, co smargiassi!

Mi, la chitara, e ti, el piatelo, sassi
     Drio no i ne cassarà; ma fiori e schei
     Perchè andemo a magnar da povarassi
     La polentina calda e i bisatei.

Vien, zogia mia, si, vien col to bel moro,
     A far un ziro zozo per ste Ca'e,
     In Marçeria, a Sa' Marco e a la Ca' D'Oro.

Varda de no stonar, nè far sempiae,
     Che no i ne cassa drìo dei pomidoro,
     O i ne copa co'n fraco de stangae;
                                   Che quando le xe dàe,
     No ne le cava gnanca el Patriarca:
     Gastu capio? ― . — Ben, montemo in barca.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Gerani_-_Poesie_veneziane,_Venezia,_Ferrari,_1903.pdf/28&oldid=73587"