I.
INVOCAZION
a la Musa
O Musa de Rialto, in Pescaria
Fra i spàresi cressua, e fra i bisati,
Lassa le sepe, meti zo i corbati,
E vien quà che cantemo in poesia.
Se no me ponzarà la fantasia
L'estro, che ponze anca el çervelo ai mati,
A Venezia ghe xe dei gran mussati,
E po ti ghe xe ti, Museta mia!
Tanto per scominçiar a far qualcossa
Fàme su 'na corona da poeta;
Larga, perchè gò la testina grossa.
Me racomando, sa? quela lengueta,
Che qualche tosa no deventa rossa;
E quela boca tienla sempre streta!
