17Perchè tuti no gh'ha la sorte bella
De star al Mondo con quella prudenza,
Come ha fato la Madre, e la Sorella,
Per pura grazia della Providenza.
Graziosa. Ho sentio a sonar la Campanella,
Credo, che le ne chiama a l'ubbidienza.
Andemo a parecchiar quel, che bisogna;
No se femo aspettar, che xe vergogna.
18Flavia. Avanti che i prencipia la fonzion,
Mettemo zo l'insonio, che avè fato,
E femo far una composizion
Da qualche omo de garbo letterato.
Graziosa. Certo! Perchè el ne canta sta canzon:
Andè via, no me fe deventar mato!
Co i se prega sti fiori, i volta el grugno,
Par, che in tel muso se ghe daga un pugno.
19E se de far qualcossa i xe sforzai
Da un Patron, da un amigo, o da un'amiga,
I ve fa quattro versi stiracchiai,
Pur che i scriva per forza, e pur che i diga.
Flavia. E quei, che per aver i buzzolai
Poverazzi, se strussia, e se sfadiga?
Graziosa. Chi lo fa co sto fin, xe un bell'aloco.
Flavia. 1 Gramarcè se ghe dise, e no xe poco.
- ↑ Gran mercè.
