FUTURA LEGENDA
In ocasion de le Auguste Nozze del Prinçipe de Napoli
co la Principessa del Montenegro
Erede fortunà del più bel Trono
Che vèder mai se possa su la tera,
Piantà dal Galantomo de so Nono
Che ga onorà el Paese in pase e in guera,
E che a un secondo Marte el paragono,
Un Principe Real un dì ghe gera,
Unico Fio, ma degno del Gran Pare
E de quel Fior soave de so Mare!
Sto Principe se svegia una matina
Che gera apena l'alba e, in gran premura,
Vestindose a la megio, el se incamina
Senza tor su cavalo, nè vetura;
E, co 'l xe stà su in çima a una colina
Che fava da scabelo a quel'altura
Che sèpara l'Italia da la Franza
Perchè le staga.... a debita distanza,
Ardito, svelto e tuto alegro in viso,
Sul qual se ghe lezeva del coragio;
Pensandoghe un tantin, ma no indeciso,
El s'à fermà per scieglierse un passagio;
