- 48.
Come ch'el mondo deventería belo
se ― come orési a çercar l'oro bon ―
se podesse tocar sul paragon
la cossienza dei omeni e 'l çervelo!
O quanto stagno lavorà a çesélo;
quanto ferazzo impatinà de otón;
che bel lusor ― de fora ― ch'el mincion
el lo crede oro sccieto, e 'l xe oripélo!
Crompando un pontapèto, una cäena,
del titolo se vol la garanzia,
de presòn o de multa soto pena;
ma l'amiçizia vien e se la rende
per gnente...: epur la xe 'na regalía
che çertuni la vende e la revende!
- 49.
Carátere, decoro, serietà
manca!... Par tuto facile e permesso
basta disinvoltura... eco el progresso
falso de la moderna soçietà.
Trópi lavora co' disonestà;
st'altri, co' indiferenza, compromesso
vede 'l bon nome, l'avegnir istesso
de la patria... o i stà ziti per viltà.
Quante lagrime, sangue, sacrifizii
ábia costà la nostra redenzion,
quanta galèra e barbari suplizii
no se recorda più; come se tuti
i eroismi e 'l sofrir de una nazion
dovesse andar a prò dei farabuti!