- 46.
Ghe xe chi çerca onori e chi valute;
chi va a cazza de nòmine a ogni costo;
chi xe beato se 'l ghe roba el posto
a l'amigo; chi vol saverle tute:
se riga drèto le spose e le púte;
se a casa vostra magnè lesso o rôsto;
se bevé acqua, opure fior de mòsto;
se avè schinele o se godè salute....
Che premura e interesse general
(su i afari dei altri!) Ma!.... per gnente....;
cussì....; tanto per dir che i xe informai.
Eco, in çità, el difeto capital:
petegolezzo, e dir mal de la zente.....
lavori, proprio, da desocupai.
- 47.
Saria mègio badar ai proprii fati,
o dei altri ocuparse a fin de ben,
perchè regnasse un fià de pase in sen
e no tiorghe 'l mestier ai spie malnati.
Cussì se comportava i antenati
che a le lenguazze ghe metéva un fren;
lori batéva el greco, el saraçen,
imponendoghe ai vinti duri pati.
O nobili caràteri e de bronzo!
I comerçi, le guere, in quele man,
dava a la patria splendor e grandezza;
e 'l popolo nol gera tanto gonzo
da pérderse in cagnére e a far bacàn,
segno de cativéria o de siochezza.