Amor col l'à sentio, segondo usanza,
S'à sgionfà da putelo e insuperbio.
Presto, el dise, domanda perdonanza.
Responde el Cavalier: Sì, son pentio:
Cossa saràve de la mia speranza
Se sta Puta no avesse a tor mario?
Caro Amor, mio tesoro, e mia colona,
Le stramberie d'un cazzador perdona.
Vendicativo e rigoroso Amor,
Nò (responde al meschin) vòi per to pena,
Che ti te struzi e desconissi el cuor,
Te vòi tegnir senza pietà in caena.
Sente la Dea pietosa el so rigor:
Son qua (la dise) in so difesa; e apena
Amor la vede a comparir, s'istizza,
E una nova contesa, oimè, s'impizza.
Ma vien a tempo el mediator cortese,
Alegro in viso, e co la face in man,
A monte a monte (el cria) sdegni e contese,
Via, fe pase fradei, deve la man.
Amor, ti sa che le più bele imprese
Senza de mi ti tentaressi in van;
Se ti vol che te sia compagno e amigo,
Ti à da far anca ti quel che te digo.
