Pagina:Collezione delle migliori opere scritte in dialetto veneziano 9.djvu/76

Da Wikisource
Jump to navigation Jump to search
100 percent.svg
Sta pagina la xe stà trascrita e rileta.



Se conclude el Contrato, e quando el sente
     El Bonfadini a nominar sta Puta,
     L'orida imprecazion ghe vien in mente,
     El resta storno e co la lengua muta.
     E el dise tra de lu: Mo che acidente!
     Se stupirìa chi la savesse tuta!
     E nol sa, che da Amor l'è sta sentìo,
     E che farghe el vorìa pagar el fio.

Nol responde de no, perchè se trata
     De una Famegia che lu stima e onora,
     E cussì facilmente no se cata
     De sti boni partii, nè qua, nè fora.
     No se pol retirar parola data,
     Ma cussì a orbon nol ghe vol ben gnancora,
     E no ghe basta a Amor ch'el sia ligà,
     Coto el vol che el se veda e brustolà.

Se recorda Imeneo del preso impegno,
     E ghe preme l'onor del camerada.
     L'à scielto con decoro e con inzegno,
     Perchè insieme i se trova, una zornada.
     Ah! col l'à vista, Amor xe arivà al segno.
     Ah! el s'à dà sto bocon de cusinada
     Che a casa imatonio, co l'è tornà,
     El criava per strada: Amor, pietà.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Collezione_delle_migliori_opere_scritte_in_dialetto_veneziano_9.djvu/76&oldid=66833"