Che za sarò laconico,
Benchè me piasa el tema.
Da quele forme angeliche,
Pipina, che grazieta
Co ti le sfogi al publico
Vestìa da Polacheta!
Che ton co' in manto regio
Duchessa de Spoleto,
Gran cosse in cuor ti maseni
Piena del to sogeto!
Che vose! che bel metodo!
Che verità de canto!
Senza quei geroglifici
Vero de l'arte impianto!
No vogio co i to' emoli
No vogio far confronto;
So che ti xe un prodigio,
So che ogni cuor xe ponto;
So che le Muse vechie,
Che pur xe fie de Giove,
Per farme estemporaneo
No basta in tute nove;
So che sta grazia insolita
La devo a ti, carina,
So che per Musa decima
Onoro ancuo Pipina.
