XVI
Grami Fiori! me fè proprio pecà
A vederve ridenti star cussì
In mezzo a quei Cavei, Cavei che a mi
4L'anema e 'l cuor deboto i m'à brusà.
Ah! scampè, Fiori, scampè via de là,
Se volè aver de vita almanco un dì,
Se no, là ve arsirè, ve incenerì,
8Che là gh'è 'l fogo, e mi lo go provà.
Piutosto el sen a farghe belo andè,
Che ve prometo e zuro, che là mo
11E seguri e freschissimi starè;
Se pur dal tropo giazzo che ghe xe
Sconto in quel cuor, a pezo rischio po,
14De restar impetrii no ve catè.
