Sta pagina la xe stà trascrita, ma la gà ancora da vegner rileta.
XI. Il Millantatore
Un tal se dava vanto, e sì 'l disea;
Che tute drio le done ghe corea,
Gh'è sta risposto: Oh questa po se sa
Che drio 'l pezo le done sempre va.
XII. Peso della Moglie
Da borasca in pericol se trovava
Una nave che gran pesi portava.
El Piloto à ordenà che ognun dovesse
Trar via 'l peso più grando che l'avesse.
Uno de quei che avea là so Mugier
De butarla in tel mar fava pensier.
Ghe xe stà domanda: Perchè cussì?
— Perchè l'è 'l più gran peso che go mì.
XIII. Virtù senza denari
Certo che sì, che a ben pensarghe su
La più bela richezza è la Vertù!
Epur apresso el mondo un omo povero;
Per virtuoso ch'el sia, l'è sempre un rovero.