VII. Il buon esempio
Se 'l Pare tuto 'l zorno alegramente
Tripudia a l'Osterìa, zoga, scialacqua,
E chiapa le so' bale bravamente,
Cossa voleu che 'l fio beva de l'acqua?
Per educar de sesto fioli e fiole
Bon esempio ghe vol e no parole.
VIII. Il Guercio e il Gobbo
Un Sguerzo una matina s'à incontrà
In t'un Gobo, e cussì el lo à burlà:
Ti è ben cargo a bon'ora sta matina.
El Gobo gh'à risposto: Poffardina,
Bisogna che a bon'ora sia per certo
Perchè ti no ti ga che un ochio averto.
IX. Vanto d'una Moglie
Una Mugier la se vantava un dì
Ch'i ghe disea minchion a so' Marì.
Un'altra gh'à risposto: Oh cara amiga,
Tasè che a farlo tal no gh'è fadiga.
