PER I MUSSATI ELETTI NOBILI VENEZIANI
SONETTO
Oh siestu maledeti sti Mussati!
Butève là sul leto un pochetin,
Apena chiapè sono, eco el violin,
4E po' la becadina su i cassati.
Sul muso, su la schena, senza pati
I ve salta, e i ve torna con morbin;
Ve dè dei sculazzoni da sassin;
8Se falè el colpo, i torna co sti ati.
Coverzìve pur quanto che volè,
Che se no i pol far altro i beca i pani
11E i ve ruza aciò el sono vu perdè;
Ma da qua avanti, stimo, che a sti cani
Bisognerà che le ferìe basè;
14Zentilomini i è fati Veneziani!
