In ste tante e sì gran regolazion,
Che sento publicar de trato in trato,
Me par che tuto sia molto mal fato,
4Secondo la mia debole opinion.
Co riverenza a la Deputazion,
Là drento no gh’è Massima de Stato,
No gh’è el publico ben, no gh’è el privato
8E, quel ch’è pezo, no gh’è Religion.
Mi v’acordo che abiè tuto el poder
De far che i Frati staga in disciplina,
11E al bisogno valerve del so aver;
Ma, pofar Dio! co la carnificina!
L’è l’istesso che aver in tel missier
14La Lege de Natura e la Divina.
