Pagina:Berto Barbarani, I due canzonieri, 1917.pdf/137

L'AVE MARIA.

     Le lusertole verde
le scapa par le sese
in fin che le se perde;

     le done del paese
le cata su i radeci¹
in meso a le vanese.²

     Su un mureto, gh'è i veci
che se la conta; al posso
vien le spose co i seci.

     Co le gambe in te 'l fosso
gh'è dei putei che pocia
e i se trà l'acqua a dosso...

     La campana batocia,³
pianse l'Ave Maria
e tuti i se insenocia...

     – Oh, che malinconia!

1. radeci: radicchi
2. vanese: tratti d'ortaglia coltivata
3. batocia: squilla.