Pagina:Assedio de Venezia.djvu/70

Da Wikisource
Jump to navigation Jump to search
75%.svg
Sta pagina la xe stà trascrita, ma la gà ancora da vegner rileta.



LXII.


La prima bala?... L'à ciapà 'na strada
De quele veramente originai.
Sta curiosona ai pì no l'è cascada
Del leto de do sposi indormenzai?...

Lori i salta in senton sù, spaventai;
E la sposina, a so mario tacada,
La pianze e ziga: — Coss'è nato mai?...
Gastu anca tì sentìo sta sfracassada?... ―

E tanto ela quanto so marìo
Vien zoso e i varda... fumo e un buso!.. E ormai,
Capida la razon de quel fifìo,

Ve so dir mi che in leto i xe tornai
E fin squasi matina i à benedìo
Quel gran fracasso che li ga svegiai!

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Assedio_de_Venezia.djvu/70&oldid=61846"