XXXIII.
E la vose lontana assae l'é andada
Tra l'isole internandose e i palui:
Fra quei poarini la s'à fato strada,
Là, in mezo ai ghebi, plaçidi cressui.
La sente i buranei che, mezi nui,
Buta le rede per la so pescada:
Quei de Torçelo, sempre là vissui,
D'amor de patria i ga sentìo sta ondada.
E Cavalin e Brondolo là sente,
Cioza e Marina; e, la bandiera rossa
Vardando sventolar alegramente,
Tute, a sta vose, le responde: — «Sì,
Del nostro sangue insin l'ultima giossa,
O divina çità, demo per tì!» —
