XXIII.
Zà gerimo in t'un sercio maledeto,
Ma col cuor sempre che 'l çercava un sbroco:
De teraferma no restava un toco
Che de todeschi el fusse proprio neto.
Farse sempre sto çircolo più streto
Sentivimo e più orendo a poco a poco:
Pieni de angustie e minaçiai dal bloco,
No ne gera restà altro che 'l leto.
'Na vogia imensa de menar le man,
Col sangue che de drento ne bogiva,
La ne spenzeva contra del patan.
La smania drento in cuor se se sentiva
De dirghe a Haynau, sporco de sangue uman:
— Ti ga a che far co de la zente viva! —
