Pagina:Assedio de Venezia.djvu/13

Da Wikisource
Jump to navigation Jump to search
100 percent.svg
Sta pagina la xe stà trascrita e rileta.



V.


E st'altra?... Piasso gavarìa le done
Nostre, sti visi freschi o biondi o mori:
Ste nostre tose snele e cocolone
Coi oci dolçi pieni de slusori.

Gavarìa piasso ste nostre matrone,
Che ga le drezze che le xe sprendori:
Ste nostre dogaresse bele e bone,
Sti zensamini, ste gioncae... sti fiori.

Ma ve so dir che, infin che i xe stai qua,
Carne de dona veneziana mai
Quei pampalughi no i ghe n'à çercà.

Anzi co quel so far, col mincionèlo
Che ga le nostre done, quei massai
Le se toleva via, pian pian, bel belo.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Assedio_de_Venezia.djvu/13&oldid=61783"