Sborio freme d'oror, ma col so inzegno
Machinando un ripiego, Buzzarona!
L'esclama, ghe vol altro? oh no m'impegno
De giustarve sta sgnesola de mona.
Bisogna prima per mandarla a segno
Che abiè pazienza, la mia cara dona
(Zà no vado lontan da sti contorni)
Che ve la meta in forma per tre zorni.
In forma, che vol dir? ― In forma, oh cazzo
Replica Sborio, e ochiando che ghe gera
Pochi passi distante de Tinazzo
Per accidente un bel cocon in tera,
Nol fà ne ben ne mal, el slonga el brazzo,
E armà de sto negozio a la massera
Senza che gnanca dal dolor la ziga
El ghe lo pianta neto in te la figa.
De la so furberia Sborio trionfante
El tol suso le viole, el se la moca
Lassando là sta vechia petulante
Faglia de cazzo, e co la forma in coca,
Quel che sia nato pò de sto birbante
Al Poeta de dirvelo no toca,
Sò ben ch'el Barba gnognolo e imbalà
A casa da là un poco xè tornà.
Pute! fe lume, el ziga, dove seu?
Come a diez'ore averte xe le porte?
Che vergogna xè questa? cossa feu?
Carogne rispondè, seu vive o morte?
Vostro Barba se copa, m'intendeu?
Moveve a compassion via pote storte
Vardè che boni sesti de Regazze
E non v'ò da chiamar storte e potazze?
