Le pute in chiacolezzo in confusion
Xè ancora drio fra ele a esaminar
Se dopo la famosa operazion
Le pol dreta la mona calcolar,
La massera intrigada dal cocon
Fà passi larghi, e stenta a caminar
El Barba imbestialio bestemia a scuro
E per prudenza pusa el culo al muro.
Finalmente confuse tute dò
Core zoso le Pute a precipizio,
Pote storte, lù replica ve gò
Ve gò proprio potazze in quel servizio,
Ma Beta franca... pote storte? oibò...
Le nostre pote no gà più sto vizio
Un professor vestio pulito assae
A maca un'ora fà ne l'à drezzae.
Come? drezzae da chi?... saressi mai?
Me trema el cuor. Intanto mareselo
Facendo co le gambe ghe xè a lai
La vecchia incoconada che bel belo
(Per consolar el Barba nei suoi guai)
A sipario levà mostra el tasselo
Disendoghe, le pute gà rason
La mia xè in forma, e drento gò el coecon.
El piovan sbalordìo de sto spetacolo
Vol petufarle, vol.... ma ghe vien mal;
Se spiega megio el zorno drio l'oracolo,
El Barba fissa e mor in ospeal.
Le mone de le pute fa el miracolo
De bordir drete un maschio in orinal
Spera la vecchia, e col cocon da bota
Tien per tre mesi in forma la so pota.
Pagina:Poesie e satire di Pietro Buratti veneziano.pdf/17
Sta pagina la xe stà trascrita, ma la gà ancora da vegner rileta.