No farte pregar
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Co te strenzo la manina | Edission e fonte ▼ | El balo de l'impianton → |
Rosina, te godistu
Qua al fresco in altana...
Da i oci lontana
Del mondo birbon?...
Ciò, varda.. e consòlite:
La luna e le stele
Ne fa da candele,
Ne fa da lampion!
Se un baso stassera
S'avemo da dar...
No far la severa,
No farte pregar!
Sti gati che sgnàgola
Su i copi, qua soto,
Sta atenta, deboto,
Che festa i se fa!
E vustu che un zòvene
Che 'l fogo se sente
Te staga darente
Cussì rassegnà?...
Se un baso stassera
S'avemo da dar...
No far la severa,
No farte pregar!
Tesoro, destrighite!....
Se a caso la mama
Te çerca, te ciama...
Faremo maron!
Fa presto, risòlvite...
Se no m'inveleno
E alora da seno
Devento un bestion!
Se un baso stassera
S'avemo da dar...
No far la severa,
No farte pregar!